Cartografías da palabra en acción en A Coruña

O IV Festival Pezas dun Teatro do Porvir, Galiza + Portugal celebróuse onte en A Coruña na procura de servir como viveiro e estímulo para as creadoras e creadores que están a bosquexar algún tipo de peza para os palcos

Laura García/ Santiago de Compostela

A VI Xornada da Sección de Literatura Dramática tivo lugar onte no Forum Metropolitano de A Coruña. Estas xornadas organizadas pola AELG en colaboración co Concello da Coruña, Deputación Provincial da Coruña, CEDRO e o Centro Camões de Vigo naceron con vocación de poñer en foco unha das manifestacións artísticas máis senlleiras e estratéxicas dun sistema literario e dunha cultura de seu.

Desde sempre, as artes vivas, especialmente o teatro e tamén a danza, utilizan o movemento, a emoción e, en moitos casos, a acción verbal, a palabra, para contestar, reivindicar, apuntar ou interrogar á comunidade que congregan sobre aspectos fundamentais da actualidade.

Este ano 2021, despois de confinamentos e restricións a causa da pandemia dende a AELG decidiron xogar todas as cartas á aposta pola creación escénica.

Con esa intención celebraron o IV Festival Pezas dun Teatro do Porvir, Galiza + Portugal. Un evento na procura de servir como viveiro e estímulo para as creadoras e creadores que, nestes momentos, están a escribir ou a bosquexar algún tipo de peza para os palcos.

Cómpre facilitar, visibilizar, abrir espazos de encontro para compartir eses procesos de creación e para atopar unha complicidade e un diálogo que poida potenciar esas pezas en construción. Ademais, buscan procurar o diálogo coas inquedanzas que, neste ámbito, podemos compartir coas dramaturgas e dramaturgos de Portugal, reforzando os lazos de irmandade que se remontan á orixe común da nosa lingua.

Textualidades que soben aos escenarios, de maneira directa ou indirecta, en pezas de danza contemporánea, en pezas teatrais ou en propostas híbridas achegadas á “performance”, desde o concepto compositivo das dramaturxias posdramáticas.

Todo isto aberto ao público que desfruta e gústalle descubrir o que se está a cocer no ámbito das escénicas.

O evento estivo acompañado por un dos directores máis relevantes do teatro contemporáneo portugués, Gonçalo Amorim, quen ademais ofreceu unha aula maxistral sobre os retos das artes escénicas no actual contexto.